Жаҳон чемпионатининг иккинчи куни 5 нафар курашчимизнинг бари шоҳсупага кўтарилди + ФОТО

Бугунги беллашувларда эркаклар -81, -90 кг, аёллар эса -57, -63 ва -70 кг вазн тоифаларида жаҳон чемпионати медаллари учун гиламга чиқишди. Юртимиз шарафини ушбу муросасиз баҳсларда ҳимоя қилган 5 нафар курашчимизнинг бари шоҳсупага кўтарилди. 

-81 кг вазнда курашган Умид Эсонов, -63 кг вазндаги Олия Ҳамидова барча рақибларини мағлубиятга учратиб, жаҳон чемпиони деган шарафли номга сазовор бўлишди. Финалда эронлик рақибидан устун келган Умид Эсонов энди уч карра жаҳон чемпиони.  

Финалга қадар етиб келган Жонибек Қозоқов (-90 кг) ва Шаҳноза Бозорова (-70 кг) кумуш медални қўлга киритган бўлса, Ҳожар Шапоатова (-57 кг) бронза медалига эга чиқди.  

Шу тариқа, Ўзбекистон терма жамоаси икки кунлик беллашувлар якунига кўра 4 та олтин, 4 та кумуш, 3 та бронза медали билан умумжамоа ҳисобида иккинчи ўринни эгаллаб турибди. Эронлик курашчилар бу борада ҳозирча пешқадам.