Жаҳоннинг биринчи ракеткаси Новак Жокович 32 ёшда!

Шу боисдан теннис юлдузини фаолиятига назар солиб ўтамиз.

Новак Жокович 1987 йил 22 майда Сербиянинг Белград шаҳрида туғилган. Бўлажак чемпион теннис билан тўрт ёшидан бошлаб шуғулланишни бошлаган. Новак профессионал фаолиятини 2003 йилдан бошлаган. Умумий ҳисобда 74 та АТP турнирида зафар қучган. Фаолияти давомида мусобақадаги иштирокидан жаъми 131,040,932 АҚШ доллардан ортиқ маблағ ишлаб топган. Шунингдек, Жоковичда «Катта дубулға» турнирларида ютилган ўн бешта соврин: Australian Open (2008, 2011-2013, 2015, 2016 ва 2019), Уимблдон (2011, 2014, 2015 ва 2018), US Open  (2011, 2015 ва 2018) ва «Ролан Гаррос»-2016 ғолиблиги бор. Новак барча «Катта дубулға» турнирларида ютган теннисчилардан бири сифатида тарихга кирган. 

Жокович 2011 йилнинг июль ойида биринчи марта АТP рейтингининг карвонбошисига айланган. Новак Сербия либосида ҳам бир қатор натижаларга эришган. Мисол учун, Жокович терма жамоаси билан 2010 йилда «Девис кубоги»да зафар қучган. 2008 йилда эса Пекин олимпиадасида бронза медални қўлга киритган. 2014 йилнинг 11 июлида Новак севгилиси Елена Ристичга уйланади. Ёш оила шу йилнинг октябрь ойида фарзандлик бўлишади ва чақалоққа Стефан деб исм қўйишади. 2017 йилнинг сентябрь ойида Жоковичлар оиласи яна бир кишига кўпайишади. Сербиялик теннисчи бўш вақтларида китоб ўқишни ва гитара чалишни ёқтиради.