"Жанглар бизнесдан осонроқ эди, чунки..." - Хабиб Нурмагомедов бизнес лойиҳалари ҳақида гапирди

"Олти йилдан бери бизнес лойиҳаларимни бошқариб келяпман ва жангчиларни тайёрлайман. Бу кун тартибига жуда эътиборли бўлишни талаб қилади. Жанг қилиш осонроқ эди, у ерда ҳаммаси соддароқ ва ҳалолроқ бўларди. Бизнесда эса баъзан ўзинг учун ноқулай шароитларда ҳам курашишга тўғри келади.

Бизнесни жамоасиз қуриб бўлмайди. Менинг спорт залим, қаҳвахоналарим бор ва ҳар бир йўналишда ўз жамоаси ишлайди. Буларнинг барчасини бир-икки йилда қурмаганман. Бунинг учун беш-олти йил вақт кетди.

Муваффақиятли бизнес қуришдаги энг муҳим нарса — маълумот. Сен уни жамоанг билан бўлишишинг, доим алоқада бўлишинг ва очиқ бўлишинг керак. Мен ҳар куни жамоам билан мулоқот қилиб туришга ҳаракат қиламан", — деди Хабиб Sharjah Entrepreneurship Festival'нинг YouTube каналига берган интервьюсида.

Шунингдек, Нурмагомедов муваффақиятли инсонлардан маслаҳат олиш муҳимлигини таъкидлади.

"Ҳа, албатта. Сендан кўра каттароқ муваффақиятга эришган инсонларни тинглаш доимо муҳим. Қора белбоғинг бўлса ҳам, руҳий жиҳатдан оқ белбоғли инсон бўлиб қолишинг керак. Ўрганишда давом эт ва ўзингни чўққига чиқдим деб ҳисоблама.

Бизнесда оқ белбоғли инсон бўлиб қолиш спортдагидан ҳам муҳимроқ", — дея қўшимча қилди Нурмагомедов.