03 окт 11:48
Янгиликлар

Теннис

Жароҳат олган Истомин иккинчи учрашувини ўтказди

Мамлакатимизнинг биринчи ракеткаси Денис Истомин Нур-Султан шаҳрида ўтказилаётган "Челленжер" туркумига кирувчи турнирнинг яккалик баҳсларидаги иккинчи учрашувида кортга чиқди.

Ҳамюртимиз нимчорак финал учрашувида бельгиялик Рубен Бемельмансга қарши баҳс олиб борди. Биринчи сет 6:4 ҳисобида Рубен фойдасига ҳал бўлди. Иккинчи сетда 4:2 ҳисобида ғалаба қозонаётган Денис кутилмаганда оёғидан жароҳат олди. Бу эса ўйин натижасига таъсир ўтказмай қолмади.

Иккинчи сет тай-брекка қадар етиб борди. Ҳисоб рақиб фойдасига 1:4 бўлиб турган бир пайтда Истомин курашни давом эттира олмаслигини маълум қилди ва натижада Бемельманс чорак финалга йўл олди.

Таққослаш учун, Истомин айни пайтда жаҳон рейтингида 164, Бемельманс эса 225-ўринни эгаллаб турганди. Теннисчилар бугунги учрашувга қадар ўзаро икки бор тўқнаш келишган ва биттадан ғалабага эришишган эди.