ЖЧ-2022 саралаш. Ироқ Эрон ва Баҳрайнга қарши ўйинларни Иорданияда ўтказади

"C" гуруҳидан жой олган Ироқ терма жамоаси ўз майдонида 14 ноябрь куни Эронни, ундан кейин 19 ноябрда Баҳрайнни қабул қилиши лозим эди. Бироқ мамлакатда юзага келган нотинч вазият туфайли ФИФА Ироқ терма жамоасига ўз майдонида ўйин ўтказишга рухсат бермади. 

Натижада Ироқ футбол федерацияси бошқа вариантларни қидиришга мажбур бўлди ва навбатдаги иккита учрашувни Иорданияда ўтказишга келишиб олди. Бу ҳақда федерация раҳбари Абделхолиқ Масуд шундай деди: "Биз Иорданияни танладик, энди Эрон ва Баҳрайнга қарши баҳсларни шу давлатда ўтказамиз. Ҳозирча ФИФАнинг тасдиғини кутяпмиз". 

Эслатиб ўтамиз, Ироқ 10 октябрь куни Гонконг билан Басрада ўйнаб 2:0 ҳисобида зафар қучган, стадионга 32 мингдан зиёд мухлис ташриф буюрганди. Гуруҳ жадвалида Ироқ 7 очко билан биринчи, Баҳрайн ҳам 7 очко билан иккинчи, Эрон эса 6 очко тўплаган ҳолда учинчи ўринда боряпти.