Жек Дрэйпер фаолиятидаги илк совринни Штутгартда қўлга киритди

Мусобақа бош соврини дунёнинг 40-ракеткаси бўлиб келган Жек Дрэйперга насиб этди. Британиялик теннисчи ҳал қилувчи финал баҳсида ATP рейтингида 95-поғонадан жой олган италиялик Маттео Берреттинини уч сет натижасига кўра мағлубиятга учратди - 3/6, 7/6(5), 6/4.

Теннисчиларнинг ўзаро илк учрашуви драматик кўриниш олиб, 2 соату 7 дақиқа давом этди. Дрэйпер 14, Берреттини 12 та эйс зарбасини амалга оширишга муваффақ бўлди. Иккала теннисчи ҳам биттадан брейкка эга бўлди. Қўшхатолар Жекда кўпроқ бўлди - 3 га 2!

Дрэйпер фаолиятидаги илк совринни айнан Штутгартда қўлга киритди. У бир ҳафталик меҳнатидан 250 рейтинг очкоси ҳамда 111,785 евро мукофот пули ишлаб олди. Британиялик 22 ёшли теннисчи фаолиятида илк бор дунё рейтингида 31-ўринга кўтарилди.