Жисмоний тарбия ва спорт вазирлигида матбуот анжумани ўтказилди

Тадбирда Жисмоний тарбия ва спорт вазири ўринбосари Ш.Мўминжонов, Ўзбекистон давлат жисмоний тарбия ва спорт университети, Жисмоний тарбия ва спорт бўйича илмий-методик таъминлаш, мутахассисларни қайта тайёрлаш ва малакасини ошириш маркази раҳбарлари, вазирликнинг тегишли бошқарма ва бўлим бошлиқлари ҳамда оммавий ахборот воситалари ходимлари иштирок этди.

Матбуот анжуманида маъруза қилган вазир ўринбосари Ш.Мўминжонов ва бошқалар Президентимиз томонидан жисмоний тарбия ва спорт соҳаси учун халқаро миқёсда рақобатбардош кадрлар тайёрлаш, бунда илғор хорижий олий таълим муассасалари билан ҳамкорлик қилиш вазифаси қўйилганини таъкидлаб, мазкур топшириқлар ижросини таъминлаш бўйича амалга оширилган ишлар ва истиқболдаги вазифалар ҳақида батафсил маълумот беришди.

Хусусан, Ўзбекистон давлат жисмоний тарбия ва спорт университети ректори Махмуджон Болтабоев муассаса моддий-техник базасини мустаҳкамлаш, талаба ёшлар учун замонавий шарт-шароит яратиш борасида амалга оширилаётган ишлар ҳамда хорижий олий таълим муассасалари билан таълим беришнинг илғор усулларини қўллаш йўлидаги ҳамкорлик алоқалари ҳақида сўзлаб берди.

Янги ташкил этилаётган Россиянинг жисмоний тарбия, спорт, ёшлар ва туризм университети филиали Самарқанд филиали ҳамда Ўзбекистон давлат жисмоний тарбия ва спорт университетининг Нукус филиали спорт таълими муассасалари учун юқори малакали кадрлар тайёрлаш мақсадида ташкил этилаётгани таъкидланиб, уларнинг фаолиятини самарали йўлга қўйиш бўйича амалга оширилаётган ишлар ҳақида ахборот берилди.

Шундан сўнг, сўзга чиққан Жисмоний тарбия ва спорт бўйича илмий-методик таъминлаш, мутахассисларни қайта тайёрлаш ва малакасини ошириш маркази директори ўринбосари Асқар Амонов марказ ва унинг филиалларида спорт фаолиятини якунлаган чемпион спортчиларнинг тренерлик билан шуғулланишлари учун қисқа муддатли ўқув курслари ташкил этилгани ҳамда спорт педагогикаси ва психологияси мутахассисликлари, болаларни сув спорти турлари ўргатадиган тренерлар тайёрлаш бўйича ҳам махсус ўқув курслари ўқув режа ва дастурлари ишлаб чиқилганини маълум қилди.

Бундан ташқари марказда спорт тиббиёти, спорт ҳакамлиги, альпинизм, қояни забт этиш ва камондан ўқ отиш спорт турлари бўйича қайта тайёрлаш ва малака ошириш курслари ўқув режа ва дастурлари ишлаб чиқилаётгани айтиб ўтилди.

Якунда матбуот анжуманига ташриф буюрган журналистларнинг саволларига жавоб қайтарилди.