101 ёшли иккинчи жаҳон уруши қаҳрамони ёш спортчилар даврасида + ФОТО

Дарҳақиқат бугунги дориломон кунларга етиб келишимиз ҳамда осойишта кунларга шукрона айтишимиз ҳар биримиз учун ҳам фарз, ҳам қарздир.

9 май – Хотира ва қадрлаш куни юртимизда ҳар йили ўзгача шукуҳ ҳамда тайёргарлик билан кутиб олинади. Иккинчи жаҳон урушида мардонавор курашган, ўзбек халқининг чинакам иродасини намойиш этган фахрийларимиз доимо эъзозда. Ўзбекистон бокс федерациясининг Навоий вилояти бўлими томонидан ажойиб анъанага айланган уруш фахрийлари ҳолидан хабар олиш бу йили ноодатий тарзда ташкил этилди.

Халқ депутатлари Навоий шаҳар Кенгаши депутати, Навоий вилояти бокс федерацияси раҳбари Сардор Ғаффоров ташаббуси билан Кармана туманида истиқомат қилаётган 101 ёшли уруш фахрийси Пирназар бобо Турдиев спорт саройига таклиф этилди.

Отахонни бу ерда 7532-ҳарбий қисм оркестри жўрлигида қадрдон «Ғалаба куйи» билан қарши олишди.

Бир асрлик хотира. Бугунидан эртаси ғанимат умр. Чеҳрасида шукроналик ҳисси бору лекин қалбида иккинчи жаҳон уруши жароҳати ўчмаган Пирназар бобо қатағон йилларида мардона жангга кириб, ҳозирги тинч-осуда ҳаётимизга ўз ҳиссасини қўшганлар қаторида. Шу куни отахон ўсмир боксчиларнинг чиқишларини иштиёқ билан томоша қилар экан, беихтиёр уларга ҳаваси келаётганлигини айтиб, ўзининг ёшлик даври хотираларини қанчалик куйиниб эсласада, бугунги кунга шукроналар келтирди.

«Ҳозир ёшларимизга яратилган шароитлар кўзни қувнатади. Бундай масканларни биз кўрганимиз йўқ. Лекин яхши яшаш учун ҳар доим ҳалол меҳнат қилдик, шукрлар бўлсин-ки, бугун эъзоздамиз» – дейди отахон суҳбат давомида.

Мазкур учрашувни ташкил этган Ўзбекистон бокс федерацияси вакиллари Пирназар отага миннатдорлик билдирар экан, отахонга узоқ умр тилаб, улардан дуо олишди.

Ўзбекистон бокс федерацияси раисининг биринчи ўринбосари Сакен Полатов томонидан махсус тайёрланган «Ғалаба-76» номли бокс қўлқопи уруш фахрийсига совға сифатида тақдим этилди.

Пирназар ота каби юртимиз нуронийлари дуода экан, осмонимиз мусаффо, тинчлигимиз ҳамиша абадий бўлажак.