Жиззахда «Соғлом келажак сари» спорт фестивали бўлиб ўтди

Ўзбекистон Республикаси Президенти Ш.М.Мирзиёев раҳбарлигида 2019 йил 19 мартдаги ўтказилган видеоселектор мажлисида белгилаб берилган 5 та муҳим ташаббуснинг иккинчиси йўналиши бўлган ёшларни жисмонан чиниқтириш, уларни спорт соҳасида қобилиятларини намоён қилишлари учун зарур шароитлар яратишга йўналтирилган ташаббус ижросини таъминлаш мақсадида юртимизнинг барча ҳудудларида спорт тадбирлари мунтазам ўтказиб келинмоқда.

Жумладан, Жиззах вилояти жисмоний тарбия ва спорт бошқармаси ва қатор ташкилотлар ҳамкорлигида «Соғлом келажак сари» шиори остида ёшлар спорт фестивали бўлиб ўтди.

Ушбу спорт фестивали чекка – Арнасой туманидан бошланди. Мазкур спорт фестивалига тумандаги мавжуд умумтаълим мактабларидан 350 нафардан ортиқ ёшлар қамраб олинди. Ёш спортчилар беш километр масофага марафон, гандбол, футбол, баскетбол ва волейбол спорт турлари бўйича мусобақаларда иштирок этишди.

Кўтаринки кайфиятда ўтказилган катта спорт тадбири байрамона концерт дастурига уланиб кетди.

Тадбир якунида ушбу спорт фестивалида фаол иштирок этган ёшлар мутасаддилар томонидан таъсис этилган эсдалик совғалари билан тақдирланишди.

Эслатиб ўтамиз, «Соғлом келажак сари» ёшлар спорт фестивали вилоятнинг барча шаҳар ва туманларида давом этмоқда.