Жиззахда 4 млрд 634,2 млн сўм эвазига бунёд этилган Қиличбозлик мажмуаси фойдаланишга топширилди

Очилиш маросимида Ўзбекистон Республикаси Спорт вазири Адкҳам Икрамов, Ўзбекистон Миллий Олимпия қўмитаси раисининг биринчи ўринбосари Отабек Умаров, МОҚ Бош котиби Ойбек Касимов, Миллий Паралимпия қўмитаси раиси Мухторхон Ташходжаев, Жиззах вилояти ҳокимининг биринчи ўринбосари Зафар Азимов, расмийлар, спорт соҳаси мутасаддилари иштирок этди.

Қайд этиш жоизки, мазкур замонавий мажмуа Ўзбекистон Миллий Олимпия қўмитаси томонидан ажратилган 4 млрд 634,2 млн сўм маблағ ҳисобидан бунёд этилди.

Мажмуанинг фойдаланишга топширилиши Жиззах вилоятида қиличбозлик спорт турини янада ривожлантириш, ёш ва иқтидорли спортчиларни саралаш, уларнинг спорт маҳоратини ошириш ҳамда юқори натижаларга эришиши учун замонавий шарт-шароитлар яратишда муҳим қадам бўлди.

Мазкур мажмуада ёш қиличбозларнинг мунтазам ва сифатли машғулот олиб бориши учун зарур имкониятлар яратилгани келгусида вилоят ва мамлакатимиз терма жамоалари сафини муносиб спортчилар билан тўлдириш, халқаро майдонларда Ватанимиз шарафини ҳимоя қиладиган чемпионларни тарбиялашга хизмат қилади.