Топурия 2026 йилнинг энг тижорий спорт юлдузлари рейтингида Жошуа, Усик ва Чимаевни ортда қолдирди

Йилда бир бор нашр этиладиган ушбу рейтингда 150 нафар спортчи ўрин олган, "Эл Матадор" эса ушбу рўйхатда 41-ўринни эгаллаб турибди. Жанг санъатлари соҳасидаги унга энг яқин таъқибчи британиялик боксчи Энтони Жошуа бўлиб, у 52-ўринни банд этган. Шунингдек, испан-грузин жангчиси Сауль "Канело" Альварес (61), Хамзат Чимаев (62), Александр Волкановски (93), Тайсон Фьюри (100), Александр Усик (109) ва Макс Холлоуэй (136) сингари спорт юлдузларини ортда қолдирган.

Нашр маълумотларига кўра, дастлаб 1202 нафар спортчи танлаб олинган, сўнгра рўйхат 247 номзодгача қисқартирилган. Бунда 2025 йил 1 июлдан 2026 йил 30 июнгача бўлган даврдаги маълумотларга таянилган. Бу эса Топуриянинг Оқ уй UFC турнирида Жастин Гэтжига имкониятни бой бергани унинг ўрнига таъсир қилмаслигини билдиради.

Спортчилар учта асосий тоифага бирлаштирилган 27 та мезон бўйича баҳоланган:

Бренднинг кучи (Brand Equity): Спортчининг бренди ҳозирда қанчалик кучли, тан олинган ва ишончли?

Ўсиш динамикаси (Momentum): Спортчининг тижорий қиймати қанчалик тез ўсмоқда?

Тижорий истиқболлар (Commercial Trajectory): Келажакда тижорий ўсиш учун қанчалик катта потенциал мавжуд?

Топурия бренд кучи учун 45 баллнинг 20.16 тасини, ўсиш динамикаси учун 40 баллнинг 33.21 тасини ва тижорий истиқболлар учун 15 баллнинг 7.74 тасини олган. Натижада унинг якуний баҳоси 100 баллнинг 61.11 тасини ташкил этган.

Рейтингни 80.95 балл билан беларуслик теннис юлдузи Арина Соболенко бошқармоқда. 

Таъкидлаш жоизки, 2017 йилда ушбу рейтингни Энтони Жошуа бошқарган эди, у Владимир Кличкони оғир вазн бўйича IBF, WBA ва IBO чемпионлик камарларини бирлаштирган жангда мағлуб этган эди.