Жиззахда спорт гимнастикаси бўйича биринчи онлайн мусобақа ўтказилади

Ушбу мусобақа Жиззах вилоятида спорт гимнастикасини янада ривожлантириш ва оммалаштириш, ўсиб келаётган ёш авлодни соғлом ва баркамол қилиб тарбиялашга кўмаклашиш, болаларни уй шароитида мунтазам равишда спорт гимнастикасига жалб қилиш мақсадида ташкил этилади. 

Жиззах вилояти жисмоний тарбия ва спорт бошқармаси томонидан ўтказилаётган спорт гимнастикаси бўйича биринчи онлайн мусобақа 15 июндан 17 июнга қадар ҳар куни соат 8:00 дан 17:00 гача бўлган вақт оралиғида бўлиб ўтади. Ғолиб ва совриндорларни тақдирлаш маросими эса 18 июнь куни ташкил этилади.

Мазкур мусобақада 2004-2013 йилларда туғилган ҳамда Жиззах вилоятида истиқомат қиладиган ёш гимнастлар қатнашиши мумкин.

Мусобақа ташкилотчилари: Жиззах вилояти жисмоний тарбия ва спорт бошқармаси, вилоят Гимнастика спорт турларига ихтисослаштирилган болалар-ўсмирлар спорт мактаби ҳамда Ўзбекистон гимнастика федерациясининг Жиззах вилоят ҳудудий бўлими.

Ғолиб спортчиларга диплом ва эсдалик совғалари ташкилотчилар томонидан карантин қоидаларига риоя этилган ҳолда уй манзилларига етказиб берилади. Иштирокчилар ўз чиқишлари ёзиб олинган видеолавҳаларни жорий йил 17 июнь куни соат 17:00га қадар +99890-538-86-61 телефон рақамидаги телеграм манзилига юборишлари мумкин.