Камондан ўқ отиш бўйича терма жамоамиз Осиё кубогида совриндор бўлди

Мазкур мусобақада Ўзбекистон терма жамоаси вакиллари ҳам иштирок этишди. Қувонарлиси, ҳамюртларимиз мусобақанинг микс йўналишида бронза медалларига эга чиқишди.

Амирхон Содиқов ва Зиёдахон Абдусатторовадан иборат таркибимиз дастлаб Ироқ термасини 5:1 ҳисобида мағлуб этишди. Чорак финал босқичида эса ҳамюртларимиз Токио-2020 олимпиадаси ғолиби саналмиш Жанубий Корея термасидан 6:2 ҳисобида устун келишди.

Афсуски, ярим финал босқичида вакилларимизга бироз омад етишмади ва улар Хитой Таипейи мамлакати вакилларига 4:5 ҳисобида мағлуб бўлишди. Бронза медаллари учун кечган баҳсда ҳамюртларимиз Бангладеш термаси вакилларини 5:3 ҳисобида енгган ҳолда Осиё кубоги совриндорлари сафидан жой олишди.