​Карантин даврида махсус мусобақа: Тошкент вилояти жисмоний тарбия ва спорт бошқармаси кубогида иштирок этинг

 Жорий йилнинг 15 март санасида Ўзбекистонда илк бора коронавирусга чалинганлик ҳолати қайд этилди. Шу муносабат билан, 2020 йил 16 мартдан бошлаб Ўзбекистон Республикаси Жисмоний тарбия ва спорт вазирлиги тизимидаги барча таълим муассасалари номаълум муддатга ёпилди. Шунингдек, мамлакатимиз ҳудудида спорт мусобақалари ва тадбирлари ўтказилиши ҳам номаълум муддатга қолдирилди.

Шундай бўлсада, аҳоли ўртасида карантин даврида бўш вақтлирни мазмунли ташкил этиш борасида Тошкент вилояти Жисмоний тарбия ва спорт бошқармаси томонидан вилоятдаги барча каратэ усталари учун махсус мусобақа ташкил этилмоқда.

Каратэнинг “ката” йўналиши бўйича онлайн тарзда ташкил этилаётган “Бошқарма кубоги” мусобақаси жорий йилнинг 20-26 апрель кунлари ўтказилади. Ушбу онлайн мусобақа Тошкент вилояти аҳолисининг уй шароитида спорт билан мунтазам шуғулланишни ташкил этишида муҳим ўрин тутади.

“Бошқарма кубоги”да ёши ва жинсидан қатъий назар Тошкент вилоятининг барча аҳолиси иштирок этиши мумкин. Иштирокчилар “ката” йўналишида нималарга қодир эканликларини исботлаган ҳолда махсус видео орқали +998915081919, +998974426767 рақамларининг  телеграм манзилларига жўнатиши зарур. Олинган видео лавҳада иширокчи ҳақида тўлиқ маълумот берилиши шарт.

Жўнатилган видеолар мусобақа ташкилий қўмитаси аъзолари томонидан кўриб чиқилади. Мусобақада иштирок этиб, 1-3 ўринни эгаллаганлар Тошкент вилояти жисмоний тарбия ва спорт бошқармаси томонидан қимматбаҳо совғалар билан тақдирланади. 

1-ўрин: Микротўлқинли печь;
2-ўрин: Тефал сув қайнатиш қурилмаси;
3-ўрин: Каратэ спорт жиҳози.

Азиз Тошкент вилояти аҳолиси, карантин даврини ўз уйингизда ўтказган ҳолда спорт билан шуғулланинг ва Жисмоний тарбия ва спорт бошқармаси томонидан ташкил этилаётган онлайн мусобақаларда мунтазам иштирок этиб, ғолиб бўлинг!

Бу ҳали барчаси эмас. Олдинда бошқа спорт турлари бўйича ҳам қизиқарли онлайн мусобақалар сизни кутиб турибди.

Уйда қолинг! Спорт билан шуғулланинг! Онлайн мусобақаларда иштирок этиб, ғолиб бўлинг! Биз сиз билан коронавирусни енгамиз!

Жисмоний тарбия ва спорт вазирлиги Матбуот хизмати