Каратэ. Жамоамиз Осиё чемпионатида иккинчи бўлди

Иккинчи маротаба ўтказилган мазкур мусобақада қитъанинг йигирмага яқин давлатидан келган 450 нафар спортчи ғолиблик учун кураш олиб бордилар.

Жумладан, жамоавий кумитэ (яккама-якка кураш) бўйича хотин-қизлар ўртасида бўлиб ўтган мусобақада олтин медалга сазовор бўлган вакилларимиз, ката (кўргазмали чиқиш) баҳсларида бронза медали билан тақдирландилар. Эркаклар ўртасидаги жамоавий кумитэ баҳсларида эса терма жамоамиз кумуш медаль совриндори бўлди. 

Қувонарлиси, ҳамюртларимиз шахсий ҳисобда бўлиб ўтган мусобақаларда ҳам кўплаб медалларни қўлга киритдилар. Бу ҳам ўз навбатида спортнинг ушбу тури мамлакатимизда йилдан-йилга ривожланиб бораётганлигидан далолат беради.

 Шу тариқа, ўта муросасиз курашларга бой кечган клублар ўртасидаги Осиё чемпионатида Ўзбекистон терма жамоаси умумжамоа ҳисобида иккинчи ўринни эгаллади. Биринчи ўринни Эрон терма жамоаси банд этган бўлса, учинчи ўрин Қозоғистон вакилларига насиб этди.

Шавкат Жалилов