Каратэ WKF бўйича Ўзбекистон кубогининг очилиш маросими бўлиб ўтди + ФОТО

Туризм ва спорт вазирлиги ҳамда Ўзбекистон каратэ миллий федерациясининг йиллик тақвим режасига асосан ўтказилаётган ушбу мусобақада Қорақалпоғистон Республикаси, Тошкент шаҳри ва юртимизнинг аксарият вилоятларидан 1 300 нафарга яқин спортчилар ғолиблик учун баҳс олиб боришмоқда.

Кеча мусобақанинг тантанали очилиш маросими ўтказилди. Унда Туризм ва спорт вазири ўринбосари Авазжон Каримов, Миллий олимпия қўмитаси раисининг биринчи ўринбосари Равшан Эрматов, МОҚ Бош котиби Ойбек Касимов ва бошқалар иштирок этишди.

Тадбирда сўзга чиққан Туризм ва спорт вазири ўринбосари А.Каримов сўнгги йилларда каратэ спорти юртимизда тобора оммалашиб бораётгани, шу билан бир қаторда спортчиларимиз ҳам халқаро майдонларда сезиларли ютуқларни қўлга киритиб келишаётганини таъкидлади. Бунга мисол тариқасида яқинда Россия Федерациясининг Қозон шаҳрида ўтказилган биринчи МДҲ ўйинларида юртимиз каратэчилари ҳам муваффақиятли иштирок этишгани, жумладан терма жамоамиз аъзолари битта олтин, иккитадан кумуш ва бронза, жами 5та медалга сазовор бўлишган ҳолда Ўзбекистон спорт делегациясининг умумжамоа ҳисобида фахрли 2-ўринни қўлга киритишларига муносиб ҳиса қўшганлигини эътироф этди.

Шунингдек, тадбир доирасида I МДҲ ўйинларида ғолиб ва совриндор бўлган каратэчиларнинг тренерларига пул мукофотлари сертификатлари топширилди.

Таъкидлаш жоиз, мазкур мусобақа терма жамоамиз мураббийлари учун шу йил декабрь ойида Қозоғистоннинг Алма-ата шаҳрида бўлиб ўтадиган ўсмирлар, ёшлар ва катталар ўртасидаги Осиё чемпионати, шунингдек ноябрь ойида БААнинг Дубай шаҳрида ташкил этиладиган катталар ўртасидаги Жаҳон чемпионатига энг муносиб спортчиларни саралаб олиш имконини беради.

Ўзбекистон кубоги баҳслари 19 сентябрга қадар давом этади.