Каратэчиларимиз жаҳон чемпионатида 7 та медаль қўлга киритишди

Ғолиблик учун 511  нафар спортчи кураш олиб борган чемпионатда Ўзбекистон шарафини «NUR-HAS» каратэ марказининг тўққиз нафар спортчилари ҳимоя қилишди. Дастлабки кунги натижаларга кўра ката баҳсларида ҳамюртимиз Мутал Назаров кумуш, Жахонгир Хайдаров бронза медалига эгалик қилди.

Жаҳон чемпионатининг иккинчи куни кумите бўйича ғолиблар аниқланди. Ўсмирлар ўртасидаги мусобақаларда спортчиларимиздан   Толиб Мардонов ва Огабек Халиқуловлар ўз вазн тоифаларида ярим финал учун ўтган кескин жангларда рақибларига имкониятни бой беришди. Севинчбек Қаршиев ҳамда Иброхим Ражабовлар эса якунда жаҳон чемпионатини бронза медал билан якунлашди.

Катталар ўртасида ўтган мусобақаларда Фазлиддин Хаётов ярим финал йўлида юришини тўхтатди. Мутлоқ оғир спортчилар мусобақасида иштирок этган Нурбек Хушманов ҳамда Рустам Зоировлар бронза медалларини терма жамоамиз ҳисобига ёзиб қўйишди.
Томошабинлар диқат эътиборини тортган қизиқарли жанглар мутлоқ оғир вазн тоифасидаги қора белбоғ соҳиблари ўртасида бўлиб ўтди. -90 килограмм вазнга эга бўлган ҳамюртимиз Мутал Назаров ярим финалда оғирлиги 140 килограмм бўлган қозоғистонлик Алексей Поляковни мағлуб этиб финалга чиқди.

Акраиналик Дмитрий Боклащук билан ўтган финал жангининг асосий вақтида эса томоналар имконияти тенг баҳоланди. Ғолиб номи қўшимча вақтларда аниқланадиган бўлди. Ва якунда ҳакамларнинг қарори билан ғалаба украиналик спортчи ҳисобига ёзилди.
Шундай қилиб «NUR-HAS» каратэ маркази вакиллари жаҳон чемпионатида 2 та кумуш ва 5 та бронза медалларига эга бўлишди.