Каратэчиларимиз Токиодаги «Premier League» мусобақасидан бронза медали билан қайтишди

Баҳсларда иштирок этган спортчиларимиз юртимизга битта бронза медали билан қайтиб келишди. Бу ҳақида Ўзбекистон каратэ Миллий федерацияси матбуот хизмати хабар қилмоқда.

Мусобақада -67 кг вазн тоифасида юртимиз шарафини ҳимоя қилган Иқболжон Узоқов Франция, Австрия, Қозоғистон вакилларини мағлубиятга учратди. Ярим финалда эса туркиялик рақибга имкониятни бой бериб қўйди. Бронза медали учун жангларда Украина ва Франция каратэчиларидан устун келди ва бронза медали эгасига айланди.

Нуфузли турнир ғолиблигига асосий даъвогар саналган ҳамюртимиз, 2017 йилда жаҳоннинг энг яхши каратэчиси сифатида эътироф этилган Садриддин Сайматов аввалига гонконглик рақибини мутлақ устунлик билан мағлуб этганди. Иккинчи босқичда франциялик рақибга қарши ўтказилган баҳсда эса у жароҳат олди ва мусобақадаги иштирокини якунлади.

Баҳсларда қатнашган Санжар Абдукаримов, Дастонбек Атаболаев, Бахринисо Бабаева, Барно Мирзаева каби каратэчиларимиз совриндорлар қаторидан ўрин олмаган бўлсаларда, якунда ўзлари учун муҳим бўлган рейтинг очколарини ишлаб олдилар. Ушбу рейтинг очколар орқали спортчилар Токио 2020 Олимпия ўйинлари лицензиясини қўлга киритишлари мумкин бўлади.