Каратэчиларимиз Япониядаги World Dream Cup турнирида + ФОТОГАЛЕРЕЯ

Tokyo Metropolitan Gymnasium аренада анъанавий тарзда ўтказиб келинаётган ушбу мусобақада 30 дан зиёд давлатдан 3800 нафарга яқин каратэчилар иштирок этишяпти. Юртимиз шарафини 5-ДАН қорабелбоғ соҳиби, Ўзбекистон Бранч чифи, шихан Мутал Назаров бошчилигидаги спортчиларимиз ҳимоя қилишмоқда. 

Музаффар Ҳикматиллаев (80 кг) 45 ёшлилар ўртасидаги беллашувларда қатнашаётган бўлса, Азиз Каримов (75 кг) 35 ёшлилар гуруҳида ўз маҳоратини намойиш этяпти. Ушбу халқаро мусобақа якунланганидан кейин қатнашчи давлатлар учун семинар ташкил этилади. 

World Dream Cup турнири доирасида Мутал Назаров Жаҳон Каратэ ташкилоти президенти Кенжи Мидори билан учрашди. Жаноб Мидори келаси йили пойтахтимизда ўтказилиши режалаштирилаётган Марказий Осиё чемпионатига келишга ваъда берди. 

Токиодаги турнир терма жамоамиз аъзолари учун ноябрь ойида Таиланд пойтахти Бангкок шаҳрида ўтказиладиган Осиё чемпионатига тайёргарлик босқич вазифасини ўтаб бермоқда. 

Дарвоқе, Мутал Назаров ва унинг шогирдларига август ойи охирида АҚШда ўтказиладиган нуфузли мусобақа учун расмий таклифнома келган.