Карен Хачанов Барселонани тарк этди

Дунёнинг 23-ракеткаси бўлиб турган Карен Хачанов илк даврадаёқ мағлубият аламини тотиб кўрди. Россиялик теннисчи биринчи давра учрашувида рейтингнинг 58-поғонасидан жой олиб турган британиялик Кэмерон Норрига 4/6, 6/3, 3/6 ҳисобларида ютқазиб қўйди. 

Бир соату 54 дақиқа давом этган баҳсда 24 ёшли Хачанов 5 та, 25 яшар Норри эса 6 та эйс зарбасини амалга оширди. Теннисчиларнинг ўзаро учрашувларидаги ҳисоб мувозанати тикланди - 1:1. Энди Кэмерон Barcelona Open Banc Sabadell турнирининг иккинчи даврасида бельгиялик Давид Гоффинга қарши кортга чиқади.