Карякин, Синдаров ва бошқалар. Дунёнинг энг ёш 10 нафар гроссмейстерлари рўйхатини биласизми?

Охирги йилларда тезда машҳурликка эришаётган инсонлардан бири шахматчилар ҳисобланади. Ёш иқтидорларнинг жаҳонда тан олиниб, гроссмейстер дея аталаши ақл гимнастикасининг бир мунча ривожланганини кўрсатади. Шу ўринда эътиборингизга дунёдаги энг ёш 10 та гроссмейстерлари ҳақидаги маълумотларни ҳавола этамиз.

10. Садхвани Раунак

2019 йилда тўплаган очколари гроссмейстер нормасига тўғри келиб, анча йиллардан бери 10-ўринни ҳеч кимга бермай келаётган хитойлик Бу Сянчжини ортда қолдиради. 13 ёш 9 ойлик пайтида дунёда тан олинган шатранж устаси кўплаб халқаро турнирларда зафар қозонган.

9.Вей И

2013 йили халқаро гроссмейстер унвонига сазовор бўлган юксак иқтидор эгаси ўша пайтда 13 ёш 8 ойлик бўлади. У бу натижа билан ҳамюртини ортда қолдиради ва рейтингимизда 9-ўринни банд этади. Шунингдек шахматчи 4 карра Хитой, бир маротаба Осиё чемпиони бўлган.

8. Магнус Карлсен

Норвегиялик таниқли шахмат устаси 2004 йил 13 ёш 4 ойлигида гроссмейстер бўлган ва ўша пайтдаги иккинчи энг ёш гроссмейстер ҳисобланган. Карлсон 4 бор Рапид чемпиони, 4 бор Блиц чемпиони ва бир маротаба классик шахмат бўйича жаҳон чемпионлигини қўлга киритган.

7. Паримаржан Неги

Ҳиндистонлик гроссмейстер 2006 йил бу номга сазовор бўлади. У ўшанда 13 ёш 4 ойлик бўлади. Афсуски 2014 йил "Стенфорд" университетида таҳсил олиш учун шахматни бир муддат тарк этади. Аммо кейинчалик мусобақаларга қайтганини маълум қилади.

6. Нодирбек Абдусатторов

Яқиндагина энг тезкор шахмат тури - Рапид бўйича энг ёш жаҳон чемпиони бўлган ҳамюртимиз 2017 йили 13 ёш 1 ойлигида дунё бўйича тан олинган. У 2012 йилда 8 ёшгача бўлган болалар ўртасида жаҳон чемпиони бўлади.

5. Рамешбабу Прагнанандҳа 

Яна бир ҳиндистонлик шахматчи 2018 йил 12 ёш 10 ойлигида гроссмейстер унвонига эга чиқади. Рамешбабу 3 маротаба ёшлар ўртасида жаҳон чемпиони бўлади.

4. Жавоҳир Синдоров

Яна бир ҳамюртимиз Жавоҳир Синдоров ҳам дунёга машҳур шахмат устаси ҳисобланади. У 12 ёш 10 ойлигида ушбу номга сазовор бўлади. Жавоҳир бир қанча йирик халқаро чемпионатларида иштирок этган. Хусусан Ўзбекистон чемпионлигини ҳам қўлга киритган.

3. Гукеш Доммараджу

Шахматнинг ватани ҳисобланган Ҳиндистон албатта бу спорт бўйича тенгсиз гроссмейстерларни тарбиялайди. Гукеш ҳам 12 ёш 7 ойлик пайтида ушбу мақомга эришади. У Осиё ҳамда жаҳон чемпионатларида ўз ёш тоифасида бир неча бор қатнашиб юқори ўринларни эгаллаган.

2. Сергей Карякин

Яқин йилларгача энг ёш гроссмейстер номини ҳеч кимга бермай келган Россия ҳамда Украина фуқароси ҳисобланган Карякин 12 ёш 7 ойлигида дунё назарига тушган. Шунингдек шатранж устаси бир неча бор жаҳон чемпиони ва жамоавий жаҳон чемпиони бўлган.

1. Абхиманю Мишра

Бир неча жабҳаларда дунёда етакчи ҳисобланган Америка бу сафар ҳам ўз жойида қолди. 2009-йил Нью-Жерсида туғилган шахматчи 2021 йилда 12 ёшу 4 ойлигида энг кенжа гроссмейстер номини олади. Ҳозиргача унинг рекордини ҳеч ким янгилагани йўқ.

Йўлдошбой Рўзматов тайёрлади