Каспер Рууд Гштаадда чемпионлик унвонини ҳимоя қилди

Дунёнинг бешинчи ракеткаси Каспер Рууд мусобақа бош совринини қўлга киритди. Норвегиялик теннисчи бу билан ўтган йилги чемпионлик унвонини муносиб тарзда ҳимоя қилди ва очколарни сақлаб қолди.  

Рууд 2 соату 36 дақиқа давом этган финал учрашувида рейтингнинг 15-поғонасидан жой олган италиялик Маттео Берреттинини 4/6, 7/6(4), 6/2 ҳисобларида мағлубиятга учратди.

Теннисчиларнинг ўзаро учрашувларида норвегиялик ҳисобда олдинга чиқиб олди - 3:2. Шунингдек, у италияликнинг 12 та ўйиндан иборат ғалабали сериясига ҳам чек қўйди. Рууд 8, Берреттини 10 та эйс зарбасини амалга оширган. 

Каспер мавсумдаги учинчи, фаолиятидаги тўққизинчи совринини қўлга киритди. Швейцариядаги муваффақиятли иштирок унга 81,310 евро мукофот пули ҳамда 250 рейтинг очкосини тақдим этди.