Каспер Рууд - учинчи бор Geneva Open ғолиби!

Мусобақа бош соврини Каспер Руудга насиб этди. Дунёнинг еттинчи ракеткаси учинчи маротаба Gonet Geneva Open ғолибига айланди. Бу сафар норвегиялик теннисчи финал учрашувида ATP рейтингида 44-поғонада бораётган чехиялик Томаш Махачни мағлубиятга учратди - 7/5, 6/3.

Махач дунёнинг биринчи ракеткаси Новак Жоковични мусобақадан чиқариб юборишга муваффақ бўлган эди. Бир соату 47 дақиқа давом этган финал баҳсида Рууд 2, Махач 3 та эйс зарбасини амалга оширган. Қўшхатолар Томаш "фойдаси"га - 3 га 0. Брейклар бўйича устунлик эса Рууд томонда бўлди - 3 га 1!

Gonet Geneva Open турниридаги муваффақиятли иштирок Руудга 250 рейтинг очкоси ҳамда 88,125 евро мукофот пули келтирди. Махач эса 150 очко ва 51,400 евро ишлаб олди. Каспер фаолиятидаги 12-совринини қўлга киритди.