Катталар ўртасидаги Ўзбекистон чемпионати старт арафасида

Йилнинг мамлакат миқёсидаги нуфузли мусобақасига "Саҳоват спорт сервис" (собиқ "Ўзбекистон" спорт саройи) спорт мажмуаси мезбонлик қилади. Чемпионатда Қорақалпоғистон Республикаси, барча вилоятлар ҳамда Тошкент шаҳридан тажрибали ва шу билан бирга истеъдодли дзюдочилар иштирок этади. 

Баҳслар 7 та (эркаклар ва аёллар) вазн тоифасида ўтказилади. Эркаклар -60, -66, -73, -81, -90, -100, +100 кг вазн тоифаларида баҳссларга киришишади. Аёллар ўртасида эса -48, -52, -57, -63, -70, -78 ҳамда +78 кг вазнларда ғолиб ва совриндорлар аниқланади. 

Ўзбекистон чемпионатида биринчи рақамли дзюдочиларимиз иштирок этмайди. Боиси, улар шу кунларда Япониянинг Осака шаҳрида ташкил этилаётган ва "Мастерс" турнирига тайёргарлик вазифасини ўтовчи халқаро ўқув-машғулот йиғинида қатнашишяпти. 

Маълумот учун, Ўзбекистон чемпионати баҳслари эрталаб соат 10:00дан бошланади. Мусобақанинг тантанали очилиш маросими эса 4 декабрь куни соат 16:00да бўлиб ўтади.