Кореяда жанг ўтказадиган боксчиларимиз тарозидан муваффақиятли ўтишди + ФОТО

FW1 промоутерлик компанияси томонидан ташкил этилаётган ушбу бокс оқшомида "Фавзул Мунаввар" промоутерлик клубининг 5 нафар чарм қўлқоп устаси ҳам рингга кўтарилади. 

Аввал хабар берганимиздек, кечанинг марказий жангида ҳамюртимиз Шаҳзодбек Шаробиддинов (5-1) кореялик Сон Кван Лига қарши рингга чиқади. Ўн раундлик жанг ғолиби WBA Asia камарига эга бўлади. 

Бугун боксчилар тарозидан ўтиш маросимида ҳозир бўлишди. Шаҳзодбек белгиланган вазн (57.15 кг) меъёрини биринчи уринишдаёқ бажарди. У роппа-роса 57 кг вазн қайд этди. Кван эса иккинчи уринишда ортиқча 600 грамм вазндан ҳалос бўла олди.  

Афсуски, Шаҳбозбек Толибжоновнинг жанги бекор қилинди. Боиси, унинг филиппинлик рақиби жароҳат олгани боис, жангда иштирок эта олмайдиган бўлди. Қолган боксчиларимиз тарозидан муваффақиятли ўтиб олишди. Дониёрбек Ҳайиталиевнинг рақиби Абдулла Ниғматов асли ўзбекистонлик бўлиб, ҳозирда Корея Республикаси шарафини ҳимоя қилмоқда.  

Эртанги жанг жуфтликлари:

67 кг вазнда 4 раундлик жанг: Дониёрбек Ҳайиталиев - Абдулла Ниғматов (Корея Республикаси) 

59 кг вазнда 6 раундлик жанг: Сирожбек Исмоилов - Ин Ҳо Чой (Корея Республикаси)

53.5 кг вазнда 6 раундлик жанг: Ҳусниддин Мараимов - Ин Су Жанг (Корея Республикаси)

74 кг вазнда 6 раундлик жанг: Эгамберди Нуриддинов - Дае Хюн Баек (Корея Республикаси)

57.15 кг вазнда 10 раундлик жанг: Шаҳзодбек Шаробиддинов - Донг Кван Ли (Корея Республикаси)