Кори Сэндхаген Мераб Двалишвилининг курашини танқид қилди

Аммо америкалик аралаш яккакураш устаси ғолибни аниқлашда назоратсиз ўтказмалар ММАда катта аҳамиятга эга бўлмаслиги керак, деб ҳисоблайди.

Ўта енгил вазн тоифасидаги чемпионлик жангида ҳакамларнинг якдил қарори билан мағлуб бўлган Сэндхаген чемпион уни партерга ўтказишга ҳаракат қилиш учун кўпроқ куч сарфлаганига ва шунчаки вақтни чўзганини урғулади. 

"Бу жангни кўрсангиз, "Вау, Мерабнинг кураши зўр бўлди" демайсиз. Чунки, назоратсиз тейкдаун нима? Партерга ўтказиш зарар қилмайди-ку. Агар сен мени шунчаки тиз чўктириб қўйсанг-у, мен дарҳол ўрнимдан турсам, бу мен учун "ММА-тейкдаун" эмас. Сен зарар етказмаяпсан ва бу билан ҳеч нарсага эришмаяпсан. Бу позицияларда ким кўпроқ куч сарфлаганини биламан - бу Мераб! Мен унинг айнан шундай қилишини кутган эдим. У мени доимий равишда қўлга олиш учун курашишга мажбур қилди ва шу йўл билан кўп вақт ютди. Тейкдаунлардан ҳимоям мукаммал бўлмаслиги мумкин, аммо ҳеч ким мени ерда ушлаб тура олмайди, шу жумладан Двалишвили ҳам", - деди америкалик Ариэл Хелванига берган интервьюсида.