Курашчилар Бўстонлиқда тайёргарлик кўришяпти ФОТОРЕПОРТАЖ

- Тақвим режаси бўйича 36 кунлик ўқув-йиғин машғулотини “Кўк сув” дам олиш зонасида ўтказмоқдамиз, - дейди мактаб-интернатининг кураш бўлими бош мураббийи Мурод Дўсимбетов. - Машғулотларда асосан ўқувчиларнинг жисмоний тайёргарлигини оширишга урғу берилаётир. Республика ихтисослаштирилган олимпия захиралари мактаб-интернати раҳбарияти болаларнинг кўнгилли ҳордиқ чиқариб, жисмоний жиҳатдан бақувват бўлишлари учун барча шарт-шароитларни яратиб берган.

Шунингдек, дам олиш зонасида Чирчиқ олимпия захиралари мактаб-интернати, Чирчиқ шаҳар болалар-ўсмирлар спорт мактаби тарбияланувчилари билан бирга турли мусобақалар, учрашувлар ўтказилаётгани барчага манзур бўлмоқда.

Мактаб-интернат курашчилари яқинда Наманган вилоятида ўсмирлар ва қизлар ўртасида соҳил кураши бўйича бўлиб ўтган Ўзбекистон чемпионатида муносиб иштирок этишган. Алиҳайдар Мажидов (55 кг.), Аҳрор Зиёдуллаев (73 кг.), Жамшид Абдужабборов (+100 кг.) лар ғолиблик шоҳсупасининг энг юқори поғонасидан жой эгаллаган. 100 кг. вазн тоифасида иштирок этган Асрор Холмаматов ушбу чемпионатнинг бронза медалига сазовор бўлган эди. Энди бу спортчилар Таиландда бўлиб ўтадиган Осиё чемпионатида ватанимиз шарафини муносиб ҳимоя этади.

Жорий йилнинг август ойи охирида Жанубий Кореяда катталар ўртасида Жаҳон чемпионати бўлиб ўтиши режалаштирилган. Ушбу нуфузли турнирга Аброр Жабборов (60 кг.), Ўрол Содиқов (81 кг.) ва Умар Бозоров (81 кг.) лар астойдил тайёрланишяпти. Шунингдек, курашчилар жорий йилда Навоий шаҳрида 2004-2005 йилларда таваллуд топган болалар ўртасида бўлиб ўтадиган мамлакат чемпионати баҳсларига ҳам қизғин ҳозирлик кўришмоқда.

Суратлар муаллифи - Алимурод Мамадаминов