Ла Лигада навбатдаги "ЎҒРИЛИК"! VAR Ламин Ямалнинг голини бекор қилишда хато кадрни танладими?

Archivo VAR нашрининг хабарига кўра, ярим автоматик офсайд тизими (SAOT) Ламин Ямалнинг голини кўриб чиқишда қўпол хатога йўл қўйган. "Реал Сосьедад" ҳамда "Барселона" ўртасидаги баҳсдан (2:1) сўнг VAR бўйича эътирозлар пайдо бўлди.

Муаммо нимада?

Асосий эътироз VAR ҳакамлари томонидан танланган кадр (фрейм) билан боғлиқ. Қоидага кўра, офсайд чизиғи тўпга сўнгги бор тегилган сонияда чизилиши керак. Бироқ эълон қилинган суратларда кўриниб турибдики:

Танланган кадр: VAR Кунде тўпга тегиб бўлган, кечикиб танланган кадрни ишлатган.

Ҳақиқий ҳолат: Тўпга охирги тегилган сонияда Ламин Ямалнинг оёғи чизиқ устида (офсайдсиз ҳолатда) турган бўлган.

Натижа: Кечикиб олинган кадр туфайли Ямалнинг оёғи офсайддадек кўринган ва гол бекор қилинган.

"Бу болалар боғчаси эмас, бу Ла Лига!"

Испаниялик экспертлар ва "Барселона" мухлислари ушбу қарорни "навбатдаги ўғрилик" деб аташмоқда. Технологиялар инсон омилини камайтириши керак эди, бироқ кадрни танлашдаги хатолик ўйин тақдирига бевосита таъсир кўрсатди. Archivo VAR нашри "SAOT Аноэтада яна қовун туширди" дея кескин фикр билдирган.

Ҳозирча Ла Лига раҳбарияти ёки Ҳакамлар қўмитаси ушбу вазият бўйича расмий баёнот бергани йўқ. Бироқ ижтимоий тармоқларда ушбу кадр бўйича баҳслар тинмаяпти.