Лас-Вегасда кутилмаган натижа! Тим Цзю бўйдор Фундорага ютқазди

Оқшомнинг марказий жанги биринчи ўрта вазн тоифасида ўтказилиб, унда WBO йўналиши чемпиони, австралиялик Тим Цзю (24-1, 17 KO) америкалик даъвогар Себастьян Фундора (21-1-1, 13 KO)га қарши рингга кўтарилди. Ўн икки раундга мўлжалланган жанг тўлиқ давом этди. 

Цзюдан бўйи деярли икки қарич баланд бўлган Фундора қонли кечган жанг якунида ҳакамларнинг айри қарори билан ғалаба қозониб, куннинг кутилмаган натижаси муаллифига айланди. Ҳакамлардан бири 116-112 ҳисобидаги ғалабани Цзюга тақдим этди. Қолган икки ҳакам эса 116-112 ва 115-113 ҳисобларида Фундора ғалаба қозонди деб ҳисобланади.

Фундора фаолиятидаги 23-жангига келиб, илк бор чемпионлик учун рингга чиқди ва бирйўла иккита камарни қўлга киритди. Себастьян Цзюнинг WBO камаридан ташқари ушбу вазнда вакант бўлиб турган WBC чемпионлик камарига ҳам эга чиқди.    

Эслатиб ўтамиз, 26 ёшли Себастьян Фундора жароҳат сабаб сафдан чиққан америкалик Кит Турманнинг ўрнини эгаллаганди. Биринчи ўрта вазн тоифасида WBA чемпионлик камари Исроил Мадримовга тегишли бўлиб турибди. Балки, ҳамюртимиз кейинги жангини Фундорага қарши ўтказар? Бу ҳолатга жароҳатидан фориғ бўлиб қайтадиган Кит Турман ҳалал бериши мумкин.