Лондондаги Bellator турнирининг марказий жанги тасдиқланди + ПОСТЕР

Bellator промоушени раҳбарлари 14 сентябрь куни Буюк Британиянинг Лондон шаҳрида ўтказиладиган турнирнинг марказий жангини тасдиқлашди. Унда ўрта вазн тоифасида амалдаги Bellator чемпиони Жонни Эблин камар учун собиқ даъвогар Фабиан Эдвардсга қарши октагонга чиқади. 

АҚШ ва британиялик аралаш яккакураш усталари ўртасидаги ушбу чемпионлик жанги реванш мақомида бўлади. Ўтган йилнинг сентябрь ойида Эдвардс Эблиндан чемпионлик камарини тортиб олишга уриниб кўрганди. Дублин шаҳрида ўтган Bellator 299 турнири доирасидаги ўша жангда Жонни рақибини учинчи раундда нокаутга учратган эди. 

Ўшандан кейин Bellator чемпиони яна бир ғалабани қўлга киритди. У Ар-Риёдда ўтган икки лиганинг қўшма туррнирида PFL чемпиони Импа Касанганаяни ҳакамларнинг айри қарори эвазига мағлуб этганди. Британиялик жангчи эса Белфастда ўтган оқшомда Аарон Жеффридан очколар ҳисобига кўра устун келди. 

Маълумот учун, Фабиан Эдвардс яримўрта вазнда амалдаги UFC чемпиони Леон Эдвардснинг кичик укаси ҳисобланади. Леон укасининг барча жангларида секундант вазифасини бажариб келади.