"Мактабларда дзюдо" дастури ижроси: Кўзгуда Тошкент вилояти ФОТОРЕПОРТАЖ

“Мактабларда дзюдо” IJF лойиҳаси бўлиб, дастурнинг асосий мақсади 5-12 ёшли болаларни дзюдо орқали ижтимоий, таълимий ва жисмоний кўникмаларга ўргатишдан иборат. Ушбу мактаблар IJF томонидан тақдим этилган татами ва кимонолар билан таъминланган. 

Хабар берганимиздек, Ўзбекистон дзюдо федерациясининг махсус ишчи гуруҳи ушбу дзюдо тўгаракларининг бугунги фаолияти билан танишишни бошлаганди. Илк манзил Тошкент шаҳри Олмазор туманидаги 29-умумтаълим мактабида фаолияти йўлга қўйилган дзюдо тўгараги бўлганди.  

Кеча ишчи гуруҳ аъзолари Тошкент вилоятининг Бўстонлиқ туманида жойлашган 6-умумтаълим мактабида бўлиб, у ердаги дзюдо тўгараги билан яқиндан танишишди. 

Фаолият юрита бошлаганига бир йил бўлган ушбу мактабда мураббий Азамат Турсунқулов болаларга дзюдо сир-асрорларини ўргатиб келмоқда. Ҳозирда бу мактабда 22 ўғил бола ва 2 нафар қизлар кунига бир маҳалдан машғулот ўтказишяпти. 

Маълумот учун, Ўзбекистон Халқ таълими вазирлиги, Халқаро дзюдо федерацияси (IJF) ҳамда Ўзбекистон дзюдо федерацияси ўртасида имзоланган Меморандумга биноан жорий 2021 йилда мамлакатимизнинг яна йигирмата умумтаълим мактабида “Мактабларда дзюдо” дастури бўйича дзюдо тўгараклари ташкил этилади.

Ўзбекистон дзюдо федерацияси Ҳакамлар қўмитаси раиси Нағмонжон Мирзараҳмонов мураббийга эсдалик совғаси топширди.