Манамада Осиё Олимпия кенгашининг гендер тенглик мавзусига бағишланган семинари бўлиб ўтди

Маълум қилганимиздек, унда мамлакатимиз номидан юртимизда аёллар спортининг фаол тарғиботчилари, хусусан, ўзбек ва жаҳон гимнастикаси афсонаси Оксана Чусовитина, Ўзбекистон замонавий бешкураш федерацияси бош котиби Ксения Гулямова, МОҚ Халқаро алоқалар департаменти бош мутахассиси Наргиза Холмирзаева иштирок этишди.

Икки кун давомида ўтказилган семинарда Оксана Чусовитина ҳам сўз олди. Гимнастика афсонаси ҳаёти ва спорт майдонида дуч келган муаммолари, уларни қандай енгиб ўтгани, жамиятда ўз ўрнини топишида спортнинг аҳамияти ҳақида тўхталиб, уни танлаганидан ҳеч қачон афсусланмаслиги, аксинча бундан бахтиёр эканини билдирди. 

Шунингдек, барча хотин-қизларга ўзларининг саломатлиги учун спорт билан мунтазам шуғулланишни тавсия қилди. Якунда ООКнинг гендер тенглик масалалари масъули Шейха Ҳаят бин Абдул Азиз Ал Халифа ҳамюртимизга эсдалик совғасини топширди.

Тадбирда нутқ сўзлаган ООК президенти вазифасини бажарувчи Ража Рандҳир Сингх ўз мурожаатида барча Миллий Олимпия қўмиталари қитъада аёлларнинг спортдаги ҳаракатини ривожлантириш ва уни юксалтиришга қаратилган саъй-ҳаракатларни қўллаб-қувватлашини таъкидлади.

Унинг қўшимча қилишича, ООК нафақат мусобақа майдонида, балки спорт ташкилотлари, маъмурият ва бошқарув ўринларида ҳам аёлларга ўз қобилиятларини кўрсатиш учун мустаҳкам платформа яратишга кўмаклашади.

Семинар давомида ҳамюртларимиз Шейха Ҳаят бин Абдул Азиз Ал Халифа, шунингдек, бир қатор хорижлик аёл мутасаддилар билан учрашувлар ўтказиб, юртимизда хотин-қизлар спорти ривожини янги босқичга олиб чиқиш каби масалалар юзасидан фикр алмашишди.

Бир сўз билан айтганда, ушбу семинар бугунги кунда аёллар спорт ҳаракати олдида турган асосий масалаларни ёритишда муҳим платформа бўлди.