20 мар 09:33
Янгиликлар

Футбол

МДҲ шифокорлари яшил майдонда куч синашади

Теглар : Футбол

Пойтахтимиз шу йил 25-30 март кунлари МДҲга аъзо мамлакатлар шифокорларининг футбол жамоалари ўртасида ўтадиган “Doctors Community Cup – Tashkent-2019” халқаро турнирига мезбонлик қилади.

Миллий матбуот марказида Ўзбекистон Республикаси Соғлиқни сақлаш вазирлиги ҳамда мамлакатимиз Соғлиқни сақлаш ходимлари касаба уюшмаси Республика кенгаши томонидан ташкил этилаётган мусобақа олдидан матбуот анжумани ўтказилди.

Унда Соғлиқни сақлаш вазири ўринбосари Баҳодир Низомов, Ўзбекистон соғлиқни сақлаш ходимлари касаба уюшмаси Республика кенгаши раиси Фарҳод Ханафаев, мамлакатимиз шифокорлар терма жамоаси бош мураббийи, Ўзбекистонда хизмат кўрсатган ёшлар мураббийи Аҳмаджон Мусаев ва жамоа аъзолари ҳамда ОАВ ходимлари қатнашди.

Мусобақа регламентига асосан ўйинларда 25 ёшдан катта бўлган, мутахассислиги ва фуқаролигидан қатъий назар, шифокорлик дипломига эга бўлган ходимлар иштирок этади. Халқаро турнирда Ўзбекистон терма жамоасидан ташқари Россия, Қозоғистон, Қирғизистон, Тожикистон, Беларусь, Украина терма жамоалари ўзаро баҳслашади.

Россия жамоаси 40 ва ундан катта ёшдаги шифокорлар билан юртимизга ташриф буюради. Шу сабабли ҳам мазкур ёш тоифасида ”Ўзбекистон – 2” терма жамоаси ҳам шакллантирилди. Шу тариқа нуфузли мусобақада жами 8 та жамоа қатнашади.

Турнирга Францияда жойлашган Жаҳон соғлиқни сақлаш ходимлари Олимпия ўйинлари ассоциацияси вакили Гийом Гассенд ҳам таклиф этилди.