Мексика - Ўзбекистон (3:3) учрашувидан кейинги қизиқ фактлар

33817 - Атлантадаги "Mercedes-Benz" стадионига ўйинни кўриш учун айнан шунча томошабин келди.

50 - Жалолиддин Машарипов Ўзбекистон терма жамоаси сафида ўзининг юбилей 50-учрашувини ўтказди. Бу борада Машарипов Александр Хвостуновга етиб олди.

22 - Ўзбекистон Катанец бошчилигидаги 22-ўйинни ўтказди ва 3-марта дуранг ўйнади. Бунгача ушбу мураббий қўл остида Венесуэла (1:1) ва Россия (0:0) билан ўйинларда муроса кўчаси танланганди.

17 - Ўткир Юсупов терма жамоада ўзининг 17-учрашувини ўтказди (Алексей Поляковга етиб олди) ва майдонга тушган дарвозабонлар орасида 6-ўринга чиқиб олди. 5-ўринда 20 та ўйин ўтказган Александр Лобанов жой олган.

4 - Ўзбекистон КОНКАКАФ минтақасининг тўртинчи терма жамоасига қарши майдонга тушди ва биринчи бор мағлуб бўлмади (Канада 1:2, Коста-Рика 1:2, АҚШ 0:3)

4 - Отабек Шукуров терма жамоамиз либосидаги 57-учрашувида ўзининг 4-голини урди. Шукуров бунгача Хитой (2016 йил), Сенегал (2018) ва Саудия Арабистони (2019) терма жамоаларига гол урганди.

2 - Азизбек Турғунбоев Ўзбекистон миллий терма жамоаси сафидаги 22-учрашувда ўзининг 2-голини урди. Биринчи голини 2022 йил Таиланд дарвозасига урганди.

1 - Бобир Абдихолиқов Ўзбекистон миллий терма жамоаси таркибидаги 9-ўйинда майдонга тушди ва биринчи голини уришга эришди.