Мераб Двалишвили тарихий UFC рекордини янгилашга тайёр

Бу грузиялик чемпион учун 2025 йил ҳисобидан тўртинчи чемпионлик ҳимоя жанги бўлади. 

"Бу ажойиб жанг бўлади. У собиқ чемпион, унда UFC октагонида қўлга киритилган кўплаб ғалабалар бор. Жанглар орасида ҳақиқатан ҳам қисқа вақт бор, лекин бу яхши - мен бандман ва март ойида яна жанг қилишга тайёрман. Февраль ойида Австралияда турнир бўлади, лекин у ерда менга жанг беришмайди деб ўйлайман. Март ойи эса идеал муддат", - деди грузиялик жангчи Ариэл Хелванига берган интервьюсида.

Двалишвили икки ярим йил олдин октагонда тўқнаш келган россиялик рақибини очиқчасига ёмон кўрган. Аммо чемпионнинг таъкидлашича, душманчилик ортда қолган.

"Мен унга нормал муносабатдаман. Уни яхши жангчи ва оилапарвар инсон сифатида жуда ҳурмат қиламан - унинг чиройли оиласи, икки фарзанди бор, у яхши ота. Баракалла! Умид қиламанки, энди у инсон сифатида яхши бўлиб қолади", - дея вазиятга изоҳ берди Двалишвили.

Эслатиб ўтамиз, Мераб Двалишвили 2023 йилда ҳакамларнинг якдил қарор билан Петр Янни мағлуб этганди. Агар у яна россияликни мағлуб эта олса, ўз номини тарихга ёздириб қўяди. Боиси, Мераб бир календарь йилида тўртта муваффақиятли чемпионлик ҳимоясини ўтказган дунёнинг биринчи UFC жангчисига айланади.

"Ютқазишдан қўрқмайман. Мен жангчиман ва барча жангларда ғалаба қозона олмаслигимни тушунаман, лекин ишимни яхши кўраман. Юқорида айтганимдек, менга жанг тайинланганида, кўпроқ диққатни жамлайман, соғлом турмуш тарзини олиб бораман ва шунчаки яхшироқ бўлишни хоҳлайман", - дея сўзларига якун ясади чемпион.