"Midori Cup -2025" халқаро турнирида каратэчиларимиз биринчи бўлишди + ФОТОГАЛЕРЕЯ

"NUR-HAS" каратэ маркази томонидан ўтказилган мусобақада юртимиз спортчиларидан ташқари Покистон, Қозоғистон, Қирғиз Республикаси ва Тожикистондан келган 150 нафардан зиёд каратэчилар бир нечта ёш ва вазн тоифаларида ғолиблик учун баҳс олиб боришди. Халқаро турнир дунёнинг 110 давлати орасида биринчилардан бўлиб Жаҳон каратэ ташкилоти президенти Кенжи Мидорига бағишлаб ўтказилди.  

Ушбу халқаро турнир Осиё чемпионати ҳамда 31 май - 1 июнь кунлари Япония пойтахти Токио шаҳрида ўтказиладиган фуллконтакт каратэ бўйича жаҳон чемпионатига саралаш вазифасини ўтаб берди. Каратэчиларимиз бўлажак нуфузли мусобақаларда Мутал Назаров бошчилигида иштирок этишади.

Халқаро турнир якунида Ўзбекистон терма жамоаси умумжамоа ҳисобида биринчи ўринни эгаллади. Жами 25 та вазн тоифасидан 14 тасида бизнинг спортчилар чемпионлик шоҳсупасига кўтарилишди. Кейинги ўринларни Қозоғистон, Қирғиз Республикаси, Тожикистон ва Покистон давлати каратэчилари банд этишди.