Миллий курашимиз яна иккита комплекс спорт мусобақалари дастурига киритилди

Анжуманда Халқаро Кураш ассоциацияси президенти Ҳайдар Фармон ҳам иштирок этди ва сўзга чиқди.

– Кураш биз учун нафақат севимли спорт, балки айни вақтда ҳаётимиз мазмунига ҳам айланиб улгурган. Биз курашни дунёда янада ривожлантириш йўлида бор куч ва имкониятларимизни ишга соляпмиз. Бу борада албатта Ўзбекистон ҳукумати, шахсан Президент Шавкат Мирзиёев жаноби олийларининг қўллаб-қувватлаши муҳим бўлмоқда.

Бир ой авал Буюк Британиянинг Бирмингем шаҳрида Спорт аккорд ташкилотининг Халқаро бизнес ва спорт саммитида кураш тақдимотини қилгандик. Халқаро спорт ташкилотлари, нуфузли ўйинлар дирекциялари билан музокаралар ўтказдик. Шуни мамнуният билан эълон қилмоқчиманки, курашни эндиликда Ислом бирдамлик ўйинлари, халқаро гимназия ўйинлари дастуридан ўрин олади. Биз бу бўйича ижобий келишувларга эришдик. 

Мустақил тан олинган спорт аъзолари иттифоқи (AIMS) аъзолигига қабул қилиниш жараёнининг амалий босқичи бошланди. Бу борада керакли масалалар бўйича ҳам саммит давомида AIMS Президенти Stephan Fox билан мулоқотлар бўлиб ўтди. AIMS Халқаро Олимпия қўмитаси томонидан курашни тан олиниши ва келгусида Олимпия ўйинлари дастурига киритилишидаги муҳим муҳим қадамлардан биридир.