Минг нафар ёшларнинг энг кучлилари аниқланди

Мамлакатимизнинг барча вилоятларидан ва Қорақалпоғистон Республикасидан 1000 нафарга яқин спортчилар иштирк этган мазкур кубок мусобақалари ёшлар, ўсмирлар ва катталар ўртасида яккалик машқлар, беллашув, Темурийлар жанг усули ва жамоавий йўналишларда бўлиб ўтди.

- Бу галги мусобақаларнинг жамоавий кўргазмали машқларининг қонун-қоидасига бироз ўзгартириш киритдик. Биласиз, таэквондо, каратэ, у-шу жанг санъатларида корейц, япон, хитой халқларининг тарихи, маданияти, анъаналари усуллар орқали намойиш қилинади. Биз ҳам шу маънода ҳар бир жамоа миллатимизнинг тарихий қаҳрамонлари образини Ўзбек жанг санъати усуллари орқали намойиш этиши лозимлигини белгиладик. Очиғи, 14 ҳудуднинг мураббийлари ва спортчилари томонидан ишлаб чиқилиб, ижро этилган усуллар барчага бирдек манзур бўлди. Асосийси, миллий қадриятларимиз ёшлар ўртасида янада оммалашди. Ўзбек жанг санъатининг янги-янги кўргазмали машқлар жамланмаси яратилди. Бу эса халқимизнинг бой анъаналари тарғиботига хизмат қилади, албатта. Шу ўринда айтиш лозимки, ушбу кубок баҳсларида сараланган терма жамоа жорий йилнинг ноябрь ойида Италияда яккакураш спорт турлари бўйича ўтадиган Жаҳон кубогида Ватанимиз шарафини ҳимоя қилади, – дейди Республика Ўзбек жанг санъати федерациясининг Тошкент шаҳар бўлими ижрочи директори Баҳодир Назаров.

Ўзбекистон кубогида умум жамоалар натижасига кўра, пойтахтлик спортчилар 1-ўрин, Тошкент вилояти вакиллари 2-ўрин, Андижон жамоаси эса фахрли 3-ўринни эгаллади.