Минус 10 очко: Хитой чемпионатида 13 та клуб жазоланди

Жами 13 та клуб турли қонунбузарликлар сабабли очколардан маҳрум этилган. Улардан 9 таси олий лигада, яна 4 таси биринчи лигада иштирок этади. Унга кўра, кўплаб жамоалар янги мавсумни манфий очколар билан бошлади.

Бу қарорлар шартнома ўйинлари, қимор ўйинлари ва коррупцияга қарши олиб борилган текширувлар натижасида қабул қилинган. Хитой футбол ассоциацияси маълумотига кўра, жазолар “ноқонуний келишувларнинг ҳажми, характери, оғирлиги ва жамиятга таъсири”ни ҳисобга олган ҳолда белгиланган.

Жазолар фақат очколарни олиб ташлаш билан чекланмаган. Клубларга катта миқдорда жарималар ҳам солинган. Жарималар 200 мингдан 1 миллион юангача бўлиб, бу тахминан 120 минг евро атрофида дегани.

Текширувлар давомида футбол тизимидаги коррупция билан боғлиқ кўплаб шахслар ҳам жазоланди. Жами 73 нафар инсон футбол фаолиятидан умрбод четлатилди. Улар орасида Хитой футбол ассоциациясининг собиқ президенти Чэнь Сюйюань ҳам бор. У 2024 йилда пора олиш айби билан умрбод қамоқ жазосига ҳукм қилинган. Шунингдек, Хитой миллий терма жамоасининг собиқ бош мураббийи Ли Те ҳам футболдан умрбод четлатилган.

Хитой футболида коррупция билан боғлиқ муаммолар аввал ҳам кузатилган. 2010-йиллар ўртасида ҳам кенг кўламли текширувлар ўтказилиб, ўнлаб футболчилар, ҳакамлар ва расмийлар жазоланган эди. Айрим клублар катта жарималарга тортилган, кўплаб шахслар эса умрбод дисквалификация қилинган.

Айрим таҳлилчилар бу муаммоларни маҳаллий футболчиларнинг паст маошлари ва маошларнинг кечикиб тўланиши билан боғлайди. Илгариги йилларда айрим футболчилар ойига жуда кам маош олгани ва муҳим ўйинлар олдидан катта пул таклифлари тушгани ҳақида маълумотлар ҳам бўлган.

Ҳозирги қарорлар Хитой футболини тозалаш ва мусобақаларнинг адолатли ўтиши учун қабул қилингани айтилмоқда. Янги мавсум бошланишидан олдин жамоалар турнир жадвалида манфий очколар билан старт олди ва бу чемпионатдаги рақобатга ҳам жиддий таъсир қилиши кутилмоқда.