16 сен 18:36
Янгиликлар

Теннис

Мириам Булгару бош совринни ватанида олиб қолди

Руминия пойтахти Бухарест шаҳрида теннис бўйича WTA 125 тоифасига кирувчи турнир бўлиб ўтди.

Мусобақа бош соврини мезбон теннисчи Мириам Булгаруга насиб этди. WTA рейтингида 202-поғонадан жой олиб турган румин тенниси маликаси ҳал қилувчи финал баҳсида ўзидан уч поғона юқорида бораётган лихтенштейнлик Катинка фон Дайхманндан уч сет натижасига кўра устун келди - 6/3, 1/6, 6/4.

Бу теннисчиларнинг ўзаро ўтказган илк учрашуви сифатида тарихга кирди. Икки соату уч дақиқа давом этган баҳсда иккала теннисчи ҳам эйс зарбасини амалга ошира олмади. Булгару 5, фон Дайхманн 2 та қўшхатога йўл қўйган. Брейклар бўйича мутлақо тенглик - 4 га 4! Ўз уйидаги тарихий ғалаба Булгаруга 125 рейтинг очкоси ҳамда 15,000 АҚШ доллари келтирди.