Миробод туманида эрталабки бадантарбия тадбири ўтказилди

Тадбир “Меҳржон" боғида ташкил этилди. Унда туман жисмоний тарбия ва спорт бўлими, тумандаги тиббиёт бирлашмалари ҳамда маҳалла фаоллари иштирок этишди.

Ҳаммамизга маълумки, эрталабки бадантарбия инсон саломатлигида муҳим аҳамият касб этади. Бу айниқса ёш авлоднинг кучли ва бақувват бўлиб улғайишига катта таъсир кўрсатади.

1000 нафарга яқин туман аҳолиси жалб қилинган мазкур спорт тадбирида иштирок этган Миробод тумани ҳокими Шуҳрат Пулатов бу ҳақда шундай дейди:

“Аҳоли, айниқса ёшлар ўртасида соғлом турмуш тарзини тарғиб қилиш – бизнинг асосий мақсадимиз. Спорт билан шуғулланган инсоннинг онгу тафаккурида фақатгина эзгулик ва инсонийлик туйғулари жўш уради. Спорт ёшу қари учун бирдек зарур. Жисмоний бақувват бўлишда ҳикмат кўп. Негаки, спорт инсон характерига ижобий таъсир қилади”, - дейди Пулатов.