“Муфтий соврини – 2025” ғолиб ва совриндорлари аниқланди ФОТОГАЛЕРЕЯ

Мусобақанинг финал учрашувида Наманган вакиллиги ва Қорақалпоғистон мусулмонлари қозиёти жамоалари ўзаро беллашди. Иккала жамоа ҳам ўйинга жиддий тайёргарлик кўриб келгани яққол намоён бўлди. Якунда Қорақалпоғистон мусулмонлари қозиёти жамоаси ғалаба қозониб, мусобақа бош совринини қўлга киритди. 

Муросасиз кечган ўйиннинг асосий вақтида жамоалар 4:4 ҳисобида дуранг қайд этишди. Ғолиб жамоа пенальтилар серияси орқали аниқланди. Унда Қорақалпоғистон мусулмонлари қозиёти жамоаси 4:2 ҳисобида зафар қучиб, "Муфтий Кубоги - 2025" чемпионига айланишди. Наманган вакиллиги жамоаси кумуш, Самарқанд вакиллиги жамоаси эса бронза медалига сазовор бўлди. 

Мусобақадан сўнг тақдирлаш маросими бўлиб ўтди. Унда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Дин ишлари бўйича қўмита раиси Содиқжон Тошбоев, Ўзбекистон футбол ассоциацияси биринчи вице-президенти Равшан Эрматов, Ўзбекистон миллий терма жамоаси ёрдамчи мураббийи Темур Кападзе, футбол афсонаси Миржалол Қосимов иштирок этишди. Ғолиб жамоа аъзоларининг ҳар бирига медаль билан бирга ноутбук тақдим этилди. 

Наманган жамоасига эса кумуш медаллар ва телевизор, Самарқанд жамоасига бронза медали ҳамда планшет топширилди. Ҳакамлар, шунингдек, “Энг яхши дарвозабон”, “Энг яхши тўпурар”, “Энг яхши ўйинчи” номинациялари ғолибларига ҳам қимматбаҳо совғалар топширилди. Шунингдек, барча ўрин соҳибларига пул мукофотлари ва эсдалик совғалари ҳам тақдим этилди.   

Ўзбекистон мусулмонлари идораси Матбуот хизмати