Муҳаммад Мокаев Brave чемпионига айланди (ВИДЕО)

Brave CF 100 оқшомида UFC`дан ҳайдалган доғистонлик Муҳаммад Мокаев ушбу лигадаги учинчи ғалабасини қўлга киритди. Бу сафарги ғалаба Мокаевга Brave энг енгил вазн (56,17 кг) тоифасидаги чемпионлик камарини тақдим этди. Мокаев вакант қолган чемпионлик камари учун ирландиялик Жерард Бернсга қарши октагонга кўтарилди ва иккинчи раунднинг бошида рақибини нокаутга учратди. 

Эътиборлиси, биринчи раундда Мокаев рақибининг белидан пастки қисмига зарба бериб юборди ва бунинг натижасида Бернс тикланиш учун беш дақиқалик тайм-аут олди. Жангдан кейин Муҳаммад Мокаев ўта енгил (61,2 кг) вазндаги Brave чемпионлик камарини қўлга киритиш асосий мақсади эканини маълум қилди. 

Қизиғи шундаки, расмий тарози маросимидан кейин Мокаев жанггача 10 килграммдан кўпроқ вазн тўплай олган. Тарозида 56,17 кг вазн кўрсатган Муҳаммад жанг куни октагонга 67,13 кг вазн билан кўтарилди.