Муроджон Аҳмадалиев: «2022 йилдаги асосий мақсадим – 4 та камарни бирлаштириш»

Хабарингиз бор, куни кеча бокс бўйича катталар ўртасидаги республика чемпионатининг финал баҳслари бўлиб ўтди. Совриндорларни тантанали тақдирлаш маросимида проф боксчимиз Муроджон Аҳмадалиев ҳам иштирок этди. Биз фурсатдан фойдаланиб Аҳмадалиевни суҳбатга тортдик. Боксчимиз келаси йилги режалар, 17 декабрдаги бокс оқшоми ва албатта Ўзбекистон чемпионатидаги рақобат ҳақида ўз фикрларини билдирди.

«Бу йил мен учун унумли йил бўлди. Камарларимни ҳимоя қилиб яна супер чемпионлик камарини қўлга киритдим. Бундан жуда хурсандам. Буларнинг барчаси учун Аллоҳга шукур қиламан. 2022 йилда нечта жанг ўтказмоқчиман? Кейинги йилдаги асосий мақсадим – 4 та камарни бирлаштириш. Жанглар сонига келадиган бўлсак, буни бироз вақт ўтганидан кейин билиб оламиз. 

17 декбар куни мухлислар учун ажойиб бокс оқшоми бўлиб ўтади. Чунки, Ўзбекистоннинг энг кучли боксчилари рингга чиқади. Уларнинг имкониятини юқори баҳолайман. Одам қилган ишни одам қила олади. Шунча меҳнат қилишди, энди буни рингдаги ҳаракатлари билан кўрсатишлари керак.

Мендан кейин қайси боксчи чемпионлик камарини қўлга киритади? Ҳозирча, Исроил Мадримов ва Бектемир Мелиқўзиев жаҳон чемпионлик камарларига интиляпти ва жуда яқин турибди.

Ўзбекистон чемпионатидаги рақобат ҳақида гапирадиган бўлсак, ўзбек бокси аввалдан кучли бўлиб келган. Жангларни кўрдингиз, жаҳон чемпионати совридорлари, Олимпиада иштирокчилари ҳам енгиляпти. Чемпионат даражасини шундан ҳам билиш мумкин. Бизнинг ортимиздан янги Олимпиада чемпионлари етишиб чиқиб байроғимизни кўтарса, бундан ҳам хурсанд бўламиз. Биз ёш укаларимизга қўлимиздан келганича ёрдам беришга тайёрмиз. Бугун шоҳсупага кўтарилган барча боксчиларимизни табриклайман», - деди МJ КАКА Аҳмадалиев.