Муроджон Аҳмадалиевнинг навбатдаги рақиби маълум бўлди

IBF томонидан берилган буйруққа кўра, жанг мажбурий даъвогар, филиппинлик Марлон Тапалесга қарши бўлиб ўтиши лозим. 

BoxingScene хабарига кўра, айни пайтда жанг бўйича музокаралар ўтказилмоқда. Агар томонлар 2 февралга қадар келиша олмасалар, жангни ташкил этиш бўйича очиқ аукцион, яъни кимошди савдоси ўтказилади. 

Эслатиб ўтамиз, Аҳмадалиев сўнгги жангини ноябрь ойида АҚШнинг Манчестер шаҳрида Хосе Веласкесга қарши ўтказган ва 12 раундлик жангда рақибини очколар эвазига мағлуб этган эди. 

Филиппинлик Марлон Тапалес шу кунгача проф рингда 38 та жанг ўтказиб, уларнинг 35 тасида ғалаба қозонган (18 та нокаут). 3 та жангда мағлуб бўлган (2 та нокаут). У ютқазган боксчилар рўйхатида Муроджондан енгилган япониялик Рёсуке Ивасани ҳам кўришимиз мумкин.