Мутал Назаров Бишкекда "мастер класс" ўтказди, унинг шогирдлари Жамбулдаги мусобақада шоҳсупага кўтарилди

Анъанавий тарзда Рамазан Маженов томонидан ўтказиб келинаётган "Жас Батыр" мусобақасида мезбонлардан ташқари қўшни давлатдан келган 300 нафарга яқин каратэчилар бир нечта ёш ҳамда вазн тоифасида медаллар учун баҳс олиб боришди. 

Халқаро турнирда Тошкент шаҳри жамоаси ҳам қатнашди. Якунда пойтахтлик каратэчилар 3 та медаль билан ватанга қайтишди. Темур Эркинов олтин, Олег Магдюг кумуш, Шоҳсанам Муҳаммадиева эса бронза медалига сазовор бўлди. Мусобақада Мутал Назаров ҳакам сифатида иштирок этди. 

Каратэчиларимизнинг устози, NUR-HAS каратэ маркази мураббийи, Жаҳон каратэ ташкилоти томонидан тайинланган вакили Бран-чиф Мутал Назаров мусобақа якунланганидан кейин икки кун давомида Қирғиз Республикаси пойтахти Бишкек шаҳрида Шинкиокушинкай каратэ бўйича халқаро семинарда иштирок этди ва ёш каратэчиларга мастер класс, яъни маҳорат сабоқларини ўтказиб берди. Назаров қирғизистонлик қора белбоғ 1-ДАН соҳиби Сергей Шевченко ёрдам берди. 

Ушбу халқаро семинарни ўтказишдан кўзланган асосий мақсад Марказий Осиёда Шинкиокушинкай каратэни янада ривожлантиришдан иборат эди. Тўрт нафар мураббий-инструктор томонидан элликдан зиёд ёш каратэчиларга кихон, идо, ката ва кумитэ бўйича сабоқ берилди. 

Келаси ой семинар иштирокчилари ДАН учун имтиҳон топширишади. Халқаро семинар якунида икки давлат ўртасида ҳамкорлик меморандум имзоланди. Мутал Назаров қирғизистонлик мураббий дўстлари билан икки мамлакат спортчилари ўртасида чемпионлар мусобақасини ўтказишга келишиб олишди.  

Яна бир маълумот, Мутал Назаров 30 май - 6 июнь кунлари Япония пойтахти Токио шаҳрида ўтказиладиган фуллконтакт каратэ бўйича жаҳон чемпионатида юртимиз номидан ягона вакил сифатида иштирок этади. Ушбу мусобақада дунёнинг 106 давлатидан каратэчиларнинг қатнашиши кутилмоқда.