Mutua Madrid Open. Соболенкога 183-ракеткани мағлуб этиш учун 150 дақиқа керак бўлди

Сайёрамизнинг иккинчи ракеткаси Арина Соболенко учинчи давра учрашувида анча қийинчиликка дуч келди. Беларуслик теннис маликасига WTA рейтингида 183-поғонада бораётган америкалик Робин Монтгомерини мағлуб этиши учун 2,5 соат вақт керак бўлди - 6/1, 6/7(5), 6/4.

Теннисчиларнинг ўзаро учрашувларида мутлақ устунлик Арина томонида - 4:0. Соболенко 8, Монтгомери 6 та эйс зарбасини амалга оширган. Иккала теннисчи ҳам 4 тадан қўшхатога йўл қўйган. Брейклар бўйича устулик беларуслик теннисчи томонида - 4 га 1. Энди у Mutua Madrid Open 1/8 финалида 15 та учрашувдан бери мағлубият нималигини билмай келаётган америкалик Даниэль Коллинзга қарши кортга чиқади.