Наманганда NUR-HAS каратэ маркази томонидан семинар ўтказилди ФОТОГАЛЕРЕЯ

NUR-HAS каратэ маркази ташаббуси билан ташкил этилган ушбу семинарда мураббийлар Мутал Назаров ва Шамсиддин Эшонов ушбу яккакураш тури билан шуғулланаётган ёшларга назарий ва амалий машғулотларни ўтаб беришди. Эшонов тўрт йил мобайнида Россия Федерациясида таҳсил олиб қайтди. Шундан сўнг тажрибали мураббий Ҳасан Назаров қўл остида билимларини янада бойитди. Ҳозирда Наманган вилояти терма жамоаси бош мураббийи сифатида фаолиятини давом эттирмоқда. 

Ушбу семинардан кўзланган мақсад 14-15 октябрь кунлари Япония пойтахти Токио шаҳрида ўтказиладиган 13-жахон чемпионати ҳамда 23-24 сентябрь кунлари Тошкент шаҳри мезбонлик қиладиган "Мустақиллик кубоги"га вилоят терма жамоаси аъзолари ҳамда номзодларини тайёрлаш, уларнинг маҳорат даражасини оширишдан иборат.

"Киокушинкай каратэ билан Россия давлатида тўрт йил шуғулланиб, таҳсил олдим. Ўзбекистонга қайтиб, "NUR-HAS" каратэ маркази асосчиси, устоз сенсей Ҳасан Назаров қўлларида малака оширдим. Ҳозирда Наманган вилояти бош мураббийи сифатида фаолиятимни давом эттиряпман. Бугунгача йигирмадан зиёд Ўзбекистон чемпионлари тайёрладим. Наманган вилоятининг Косонсой шаҳрида юздан ортиқ шогирдларимга шинкиокушинкай каратэни ўргатиб келяпман", - дейди Шамсиддин Эшонов.

Бу каби семинарларни Республикамизнинг бошқа вилоятлари ва шаҳарларида ҳам ўтказиш режалаштирилган.