Ник Киргиос 2019 йилдан буён биринчи титулини қўлга киритди

Жаҳоннинг 63-ракеткаси австралиялик Ник Киргиос турнир финалида АТР рейтингида 96-поғонани эгаллаб турган япониялик Ёсихито Нисиокани 6/4, 6/3 ҳисобида мағлуб этди ва чемпионликни қўлга киритди.

Учрашув 1 соату 23 дақиқа давом этди. Спортчиларнинг ўзаро учрашувларида ҳисоб австралиялик спортчи фойдасига йирик кўринишга келди, 5:0.

City Open турнирида ғалаба қозонгани учун Киргиос 500 рейтинг очкоси ва 342 800 доллар мукофот пулига эга бўлди. Ушбу рейтинг очкоси туфайли Киргиос ўтган ҳафтадаги ўрнидан 26 поғона юқорилаб, Топ-40 ликка қайтишга муваффақ бўлди.  Шунингдек, бу унинг 2019 йилдан буён биринчи титулидир.