Нурмагомедовнинг UFC`даги эҳтимолий олти хонали гонорари маълум қилинди

Агар Усман дунёнинг энг кучли лигаси билан шартнома имзоласа, у ҳар бир жанг учун тахминан уч-тўрт миллион доллар олиши мумкин, деб ҳисоблайди UFC`нинг собиқ икки вазн тоифасидаги чемпиони Генри Сехудо.

"Усман Нурмагомедовнинг UFC билан келишуви ҳар бир жанг учун уч-тўрт миллион доллар атрофида бўлади. Мен адашяпманми? У яқиндагина икки миллиондан воз кечди", – деди америкалик жангчи Камару Усман билан биргаликдаги подкастда.

"Адашмаяпсан. Менимча, сен ҳақиқатга яқин баҳо беряпсан, чунки очиғини айтганда – UFC буни ўзига эп кўра олади ва унга шунча пул тўлай олади, чунки улар бу маблағни қайтариб олишади. Улар бу йигитдан Россияга яқин бўлган барча ҳудудларда, Қатарда, Абу-Дабида фойдаланишлари мумкин ва улар бу пулларни ишлаб топишади", – дея қўшимча қилди Усман.

Маълумотларга кўра, PFL лигасида мағлубият нималигини билмаган россиялик аралаш яккакураш устаси ҳар бир жанги учун бир миллион доллар олган ва ташкилотнинг икки баробар кўп маблағ эвазига янги шартнома имзолаш таклифини рад этган.